Runnegar: “Bizitza estralurtarra bilatzea katedralak eraikitzea bezalako lana da”
Archivado en: Haitzen hitza, Bruce Runnegar, astrobiología
(Runnegar, ex director de astrobiología de la NASA: "Buscar vida extraterrestre es una tarea parecida a construir una catedral". Por ahora el texto el resumen de la conferencia sólo está disponible en euskera. On egin).
NASAko astrobiologia zuzendari ohia da Bruce Runnegar, bizitza estralurtarra bilatzeko proiektuak bideratu zituena. Haitzen hitza zikloaren barnean, gure planetatik kanpo bizitza aurkitzeko aukerei buruz aritu zen.
Bizigarritasunaren kontzeptua azaldu zuen Runnegar-ek. Gure planetan bertan, bizitzarentzat ustez ezinezkoak ziren eremu askotan izaki bizidun bereziak aurkitu dituzte ikerlariek (Australiako barnealdeko zenbait eskualdetan, itsas hondotan, lurraren sakoneran...). Bizigarritasun eremu horiek uste baino zabalagoak direla frogatu dute, eta Lurretik kanpo ere baldintza zail horietan bizitza topatzeko itxaropena zabaldu da.
Gure Eguzki Sisteman badira bizitza garatzeko eremu egokiak, eguzkiarekiko distantzia jakin baten barnean. Antzeko baldintzak bilatzen ari dira orain urruneko beste planeta-sistematan, gure eguzkiaren antzeko masa duten izarren inguruan. Gliese 581 izarraren kasua aipatu zuen Runnegar-ek, bizitzarako aproposak izan daitezkeen lau planeta baititu inguruan.
Espazioan duten kokapenaz gain, planetek berek dituzten baldintzak ere kontutan hartzen dituzte ikerlariek. Argirik jasotzen ez duten mundu izoztuen azpian izaki bizidunak egon daitezke, Lurrean bertan aurkitu izan baitira: eguzki-argirik jasotzen ez duten izakiak gai dira uretan nahastutako zenbait mineralekin bizitzeko, eta erabat izoztuta dauden inguruneetan ezinezkoa bada ere, izotz-eremutan dauden zenbait mikrobiori nahikoa zaio ur likido kopuru txikiena bertan bizi ahal izateko.
Jupiter planetaren Europa satelitea, adibidez, izoztutako bola handi bat da, baina baliteke aipatutako baldintza horiek ematea eta bertan izakiren bat bizi izatea.
Ezagunagoa eta gertuagoa da Marte. XIX. mendean basoak, itsasoak eta ubideak egon zitezkeela pentsatu bazuten ere, azken hamarkadetan bidalitako zunda eta errobotek frogatu dute planeta osoa basamortu handi bat dela. Dena den, badira zenbait arrasto bizitzaren seinale izan daitezkeenak. Metanoa, adibidez: uraren eta harkaitzen arteko erreakzioak sortutakoa izan daiteke besterik gabe, baina baita hildako materia organikoak sortutakoa... edota bizirik dauden mikrobioek sortutakoa. Aurrerantzean bidaliko dituzten tresnek (adibidez, 2011n abiatuko den Mars Science Lab-ek) bizigarritasun eremuak bilatuko dituzte planeta gorrian. Beste kontu bat da bizitza zantzuak topatzea, eta ez dirudi errobot hauek gai izango direnik.
Bizitza estralurtarra aurkitzeak zenbait belaunaldiren ahalegina eskatuko duela adierazi zuen Runnegar-ek: "Erdi Aroko katedralak eraikitzen zituztenen parekoak gara astrobiologoak; guk ez dugu lana bukatuta ikusiko, baina horretan dihardugu, gure seme-alabek edo ilobek edo iloben ilobek lortu dezaten".
Publicado el 5 de mayo de 2009 a las 12:45.